Արագածոտնի մարզպետի աշխատակազմ

Գյուղի համար մշակված մաստեր պլանն իր մեջ ներառում է գյուղի ամբողջական ճարտարապետական և տնտեսական կոնցեպտը և ըստ այդ կոնցեպտի՝ իրականացվում են լայնածավալ աշխատանքներ:

Լուսագյուղում հիմնադրամի կողմից կառուցվել է նոր դպրոց՝ նախատեսված 220 աշակերտի համար, և այժմ իրականացվում են ներքին հարդարման աշխատանքները։ Այն ընդգրկված է Կառավարության «300 դպրոց 500 մանկապարտեզ» ծրագրում։

Հիմնադրամի կողմից բարեկարգվում են գյուղի ճանապարհները, ճամփեզրերը, փոխվում են անհատական բնակելի տների տանիքները, ստեղծվում են այլ ենթակառուցվածքներ, ճարտարապետական ուրույն լուծումների միջոցով գյուղը դառնում է առավել կոլորիտային ու գրավիչ։

Մարզպետ Սերգեյ Մովսիսյանը, Ապարանի համայնքապետ Կարեն Եղիազարյանի, «Արմենիան Ֆյուչր» հիմնադրամի գործադիր տնօրեն Մերուժան Բադալյանի, մարզպետարանի ղեկավար կազմի ներկայացուցիչների հետ շրջեց կառուցվող դպրոցի շինհրապարակում, քննարկեց ընթացիկ և կատարվելիք աշխատանքները։

Մարզպետը հանձնարարեց դպրոցի կառուցման ընթացքում խիստ պահպանել նորմերը, հետևողական լինել որակի հարցում։

Գյուղի զարգացման ծրագիրը բարձր արդյունավետությամբ իրականացնելու գործում մարզպետն ընդգծեց ՀՀ կառավարության, մարզպետի աշխատակազմի, համապատասխան գերատեսչությունների և Ապարանի համայնքապետարանի համատեղ աշխատանքի կարևորությունը և պատրաստակամություն հայտնեց սերտ գործակցության։