Արագածոտնի մարզպետի աշխատակազմ

Նախարար Ժաննա Անդրեասյանը ողջույնի խոսքում ընդգծել է հայ և վրացի պատանիների ու երիտասարդների միջև հաղորդակցման, գիտելիքների ու փորձի փոխանակման, ինչպես նաև միջմշակութային կապերի ձևավորման կարևորությունը։ Նրա խոսքով՝ նմանօրինակ միջոցառումները նպաստում են երկու ժողովուրդների մշակույթների և ավանդույթների յուրահատկությունների փոխճանաչմանը, լեզվական և աշխարհագրական առանձնահատկությունների ընկալմանը՝ ամրապնդելով բարիդրացիական հարաբերությունները և համագործակցությունը։

 

Երիտասարդական հավաքի շրջանակում տեղի է ունեցել «Երիտասարդական քաղաքականությունը Հայաստանում և Վրաստանում, երիտասարդների դերը որոշումների կայացման գործընթացներում» թեմայով պանելային քննարկում:

ԿԳՄՍ նախարարի տեղակալ Արթուր Մարտիրոսյանը կարևորել է Հայաստանի և Վրաստանի՝ երիտասարդական պետական քաղաքականության առանձնահատկությունները։ Նրա դիտարկմամբ՝ երկու երկրների քաղաքական ուղեգծերը շատ առումներով նման են՝ հատկապես ժողովրդավարության ճանապարհի ընտրությամբ:

 

Պանելային քննարկման ընթացքում ԿԳՄՍ նախարարի տեղակալը ներկայացրել է ՀՀ պետական քաղաքականությունը երիտասարդության ոլորտում, իրականացվող ծրագրերը, առաջնահերթությունները:Արագածոտնի մարզպետի տեղակալ Արմեն Գրիգորյանը ողջույնի խոսքում նշել է, որ Հայաստանը և Վրաստանը դարերի պատմություն ունեն, և երկու երկրների երիտասարդները նման նախաձեռնությունների շրջանակում համագործակցելու, միմյանց ճանաչելու բացառիկ հնարավորություն են ստանում, ինչն ամրապնդում և նոր շունչ է հաղորդում հայ-վրացական բարեկամությանը։

 

Ողջույնի խոսքով հանդես է եկել նաև Վրաստանի կրթության, գիտության և երիտասարդության նախարարի տեղակալ Բայա Քվիցիանին՝ կարևորելով Հայ-վրացական երիտասարդական կապերի ամրապնդումն ու համագործակցությունը փոխադարձ փորձի յուրացման և նոր ծրագրերի իրագործման համատեքստում: