Արագածոտնի մարզպետի աշխատակազմ

Ամանորի և Սուրբ Ծնունդի առիթով ձեզ եմ հղում իմ սրտագին շնորհավորանքը, որում ծրարված է նորի հանդեպ լուսավոր հույս ու հավատ։

Տարեմուտին բոլորս ենք սպասում գեղեցիկին, բարուն, վսեմին, և վստահաբար, հրաշքի սպասումը բոլորիս է ընծայում երջանիկ ու ապրեցնող ակնթարթներ։ Նոր տարին մեր մտքում կամրջում է անցյալն ու ներկան, ամփոփում ձեռքբերումներն ու բացթողումները, դարձնում մեզ խոհական, մեր միտքն ու հոգին լցնում ավելիին ձգտելու և ավելին անելու եռանդով։

Անշուշտ, բացի անձնական երազանքներից, մեր թևավոր երազանքները կապվում են Հայաստանի Հանրապետության, մեր ժողովրդի բարօրության ու համամարդկային խաղաղության հետ։

Մեր պետությունը մեր մեծ ընտանիքն է, որը բոլորիս միավորում է ընդհանուր նպատակներով։ Եվ ուզում եմ, որ նոր տարում մենք համակվենք Հայաստանն օր առաջ հզոր դարձնելու նվիրական իղձով, սրտացավ աշխատելու կամքով, մերձավորի հանդեպ սիրով ու բարությամբ, միմյանց հանդեպ հանդուրժողականությամբ ու կամեցողությամբ։