Արագածոտնի մարզպետի աշխատակազմ

 Սիրելի՛ ուսուցիչներ, մանկավարժներ,
Խոստումնալից ապագայի լուսավոր հավատով շնորհավորում եմ ձեր մասնագիտական տոնը։
Պետության ու հասարակության զարգացման գործում ձեր դերակատարումն ամբողջովին ընդգծելու համար երբեմն թվում է՝ բառերը դույզն-ինչ չեն արտահայտում մեր մտքերը։ Գիտելիքի, փորձի, սիրո ու նվիրումի ներդրմամբ դուք ամեն օր մեծ աշխատանք եք կատարում՝ սնելով մեր վաղվա քաղաքացու, գիտնականի, պետական գործչի, ռազմագետի, շինարարի և այլ կարևոր մասնագետների հոգու և մտքի ուժ առնող ծիլերը։
Տեխնոլոգիական դարաշրջանի խելահեղ փոխակերպումների շղթայում ժամանակի հրամայականն անդրադառնում է նաև կրթական միջավայրի վրա, և այստեղ է, որ ուսումնական միջավայրի արդիականացմանն ուղղված մեր ջանքերը միավորում ենք ձեր պրոֆեսիոնալիզմի հետ՝ մշակելու այն պարարտ հողը, որում իր արմատն է ամրացնում հասակ առնող մեր սերունդը։
Իմ խորին համոզմամբ՝ ուսուցիչն է աշակերտի մեջ սովորելու ու գիտելիք ստանալու հանդեպ ամենամեծ հետաքրքրությունը սերմանողը։ Եվ իհարկե, ժամանակի պահանջով, ստեղծարար, մոտիվացնող ու պահանջկոտ ուսուցիչն է առաջադեմ աշակերտի լավագույն մեկենասը։
Ուզում եմ ձեզ ջերմեռանդություն ու ամուր առողջություն մաղթել և հավատում եմ, որ միասին դառնալու ենք մրցունակ կրթության ջահակիրները։

ՀՀ ԱՐԱԳԱԾՈՏՆԻ ՄԱՐԶՊԵՏ
ՍԵՐԳԵՅ ՄՈՎՍԻՍՅԱՆ