Պաշտոնական էլ. փոստ
(միայն www.e-citizen.am համակարգով ծանուցումների համար)
Տպել
Նորություններ
Գիտելիքը կյանքի առաջընթացի, լույսի, ազդեցության ու բարեկեցության մասին է
01.09.2024
Գիտելիքի ու դպրության լուսավոր ոգեշնչմամբ՝ շնորհավորում եմ ձեր նոր ուսումնական տարին, սիրելի՛ դպրոցականներ, ուսանողներ, մանկավարժներ։
Մենք կրթության հարգն իմացող ազգ ենք, և կարող եմ ասել, որ մեր պետության մեջ տարեցտարի ընդլայնվում, վերաիմաստավորվում է կրթության դերը։ Այսօր, առավել քան երբևէ, մենք գիտակցում ենք նորօրյա իրականությանը համահունչ կրթություն ունենալու անհրաժեշտությունը։
Դրա վառ վկայությունը Կառավարության ձեռնարկած մեծածավալ բարեփոխումներն են, որոնց վերջնանպատակը երկրում նոր որակի, մրցունակ կրթություն և գիտություն ունենալն է։
Կյանքում արժեքավորի և լավի համար նպատակասլաց պայքարում են, և միանշանակ, գիտելիքն ու կրթությունը այն ամենաարժեքավորներից են, որոնց համար պետք է շատ ջանք գործադրենք, աշխատենք, իսկ հետո վայելենք դրանց բարի պտուղները։
Սիրելի՛ աշակերտներ, ուսման տարիներին ձեր գլխավոր առաքելությունը լավ սովորելն է, և մաղթում եմ, որ միշտ համակված լինեք սովորելու վառվող ձգտումով։
Առանձնահատուկ շնորհավորում եմ մեր առաջին դասարանցիների մուտքը դպրոց և մաղթում, որ նրանց նոր սկսվող ուղին բեղմնավոր լինի։
Աշխատանքում պատասխանատու մոտեցում և նվիրում եմ մաղթում մեր հարգարժան մանկավարժներին, որոնց ափերում ենք տեսնում առաջադեմ և լուսավոր սերունդ ունենալու նվիրական ցանկությունը։
Շնորհավոր 2024-2025 ուսումնական տարվա մեկնարկը,
ի գործ՝ դեպի գիտելիքառատ ձեռքբերումներ։
ՀՀ ԱՐԱԳԱԾՈՏՆԻ ՄԱՐԶՊԵՏ ՍԵՐԳԵՅ ՄՈՎՍԻՍՅԱՆ
