Արագածոտնի մարզպետի աշխատակազմ

Բանակի 32-րդ տարեդարձի առիթով Արագածոտնի մարզպետ Սերգեյ Մովսիսյանը, մարզպետի աշխատակազմի ղեկավար կազմի և ուժային կառույցների ներկայացուցիչներ, համայնքապետեր և պաշտոնատար այլ անձինք վաղ առավոտյան այցելեցին ՀՀ ՊՆ N զորամաս։

Մարզպետը, ողջունելով զինվորներին, հղեց օրվա առաջին շնորհավորանքը։

«Սիրելի՛ եղբայրներ, այս օրը մեծ կարևորություն ունի մեզ համար։ Մեր բանակը կայացել է՝ անցնելով դժվար ճանապարհ, և այսօր ամուր կանգնած է ոտքերի վրա՝ տղամարդուն գեղեցկացնող սպիներով։ Մեր բանակին մաղթում եմ ուժ ու կորով, մեր ժողովրդին իմաստնություն։ Աստված պահապան բոլորիդ, խաղաղություն մեր երկրին»,-իր ուղերձում ասաց Սերգեյ Մովսիսյանը։

Մեր զինվորի, բանակի կերպարն արժևորող ու հերոսացնող խոսքեր ասացին զորամասի հրամանատարը, զինվորականներ։

Զորամասի կողմից պատվոգրեր հանձնվեցին Արագածոտնի մարզպետ Սերգեյ Մովսիսյանին, մարզպետի աշխատակազմի ղեկավար կազմի ներկայացուցիչների, համայնքապետերի՝ ՀՀ ԶՈւ կազմավորման 32-րդ ամյակի և բանակ-հասարակություն կապի ամրապնդման համար։

Մարզպետը իր անունից, Բանակի 32-րդ տարեդարձի առիթով շնորհակալագրեր և հուշանվերներ հանձնեց զորամասի զինվորականներին՝ հայրենանվեր ծառայության և բարձր կարգապահության համար։

Բանակի օրվան նվիրված միջոցառման պաշտոնական մասին հաջորդեց մշակութայինը՝ ազգային երգ ու պարի ուղեկցությամբ։

Շնորհավո՛ր տարեդարձդ, փառապանծ բանակ։