Արագածոտնի մարզպետի աշխատակազմ

Ողջունելով մասնակիցներին` Սերգեյ Մովսիսյանն ազդարարեց նիստի բացումն ու ներկայացրեց օրակարգային առաջին հարցը, որը վերաբերում էր մարզի համայնքների սեփական եկամուտների հավաքագրման աշխատանքներին։ Առկա ցուցանիշների շուրջ զեկուցեց մարզպետի աշխատակազմի ֆինանսական և սոցիալ-տնտեսական զարգացման վարչության պետ Նորայր Գալստյանը։

Հաջորդ 3 հարցերի վերաբերյալ զեկուցեց ՏԿ և ՏԻՀ վարչության պետ Հովհաննես Ասատրյանը։ Նշված հարցերն էին՝ մարզի համայնքներում ամենամյա չօգտագործված արձակուրդների, համայնքային սեփականություն հանդիսացող գույքային միավորների նկատմամբ իրավունքների պետական գրանցման աշխատանքների ու բնակչության ազդարարումն ապահովելու նպատակով մարզում ազդարարման համակարգի ներդրման վերաբերյալ։

Նիստը շարունակվեց Արագածոտնի մարզի համաչափ զարգացմանն ուղղված՝ 2024 թ․ նախատեսվող սուբվենցիոն ծրագրերի հայտերի և տեխնիկական բնութագրերի ներկայացման կարգի մասին զեկուցմամբ։ Թեման վերլուծեց Զարգացման ծրագրերի, զբոսաշրջության և վերլուծության բաժնի պետ Գագիկ Պողոսյանը։

Ուշագրավ է, որ ըստ ներկայացվածի, եկող տարի ակնկալվում է իրականացնել շուրջ 12 մլրդ դրամի ծրագիր, ինչն այս տարվա ծրագրերի գումարի գրեթե կրկնակին է։ Ընդ որում, նշվածից շուրջ 7 մլրդ դրամի հայտը Աշտարակ խոշորացված համայնքինն է։ Արձանագրվեց, որ 2024 թ․ սուբվենցիոն ծրագրերի հայտ ներկայացնելիս ակտիվություն են ցուցաբերել մարզի 8 համայնքներից 7֊ը․ պասիվ են եզդիական 2 համայնք՝ փոքր բյուջեի պատճառով։

Օրակարգը եզրափակող վերջին 2՝ «Ընդերքօգտագործման նպատակով տրամադրված հողամասերի նպատակային նշանակությունների փոփոխման մասին» և «Համայնքների ենթակառուցվածքների զարգացմանն ուղղված 2022-2023թթ. սուբվենցիոն ծրագրերով իրականացվող աշխատանքների վերաբերյալ» հարցերը զեկուցեց Քաղաքաշինության, հողաշինության և ենթակառուցվածքների կառավարման վարչության պետ Հակոբ Ստեփանյանը։ Կառավարություն-համայնք գործակցությամբ իրականացվող ծրագրերի ընթացիկ արդյունքների մասին խոսելիս Հակոբ Ստեփանյանը նշեց, որ շինարարական աշխատանքների համար նպաստավոր ժամանակահատված է, և տարբեր համայնքներում տարաբնույթ ծրագրերի կատարումն ակտիվ ընթացքում է, դրանց զգալի մասը մոտենում է ավարտական փուլին։

Հնչած զեկուցումներն, ըստ էության, վերհանում էին նաև ոլորտում առկա խնդիրները, որոնց վերաբերյալ մարզպետ Սերգեյ Մովսիսյանը հանձնարարականներ տվեց ոլորտային պատասխանատուներին։

Ամփոփելով նիստը` Սերգեյ Մովսիսյանն ընդգծեց, որ մարզի զարգացմանն ուղղված ցանկացած աշխատանք պետք է կատարվի ողջամիտ ժամկետում և պատշաճ հետևողականությամբ։

Մարզպետը բոլորին արդյունավետ աշխատանքային շաբաթ մաղթեց։