Արագածոտնի մարզպետի աշխատակազմ

Մանկապարտեզների կառուցումը մարզպետարանի օրակարգում առաջնային է. Արագածոտնի մարզի Արագածոտն գյուղի փոքրիկ բնակիչները շուտով նոր ու հարմարավետ մանկապարտեզ հաճախելու հնարավորություն կունենան՝ շնորհիվ կառավարություն-համայնք համաֆինանսավորմամբ իրականացվող սուբվենցիոն ծրագրի:

Մարզպետ Ռազմիկ Պետրոսյանի հանձնարարությամբ՝ մարզպետարանի քաղաքաշինության վարչության պետ Հակոբ Ստեփանյանն այցելել է շինհրապարակ և ծանոթացել է իրականացվող աշխատանքների ընթացքին:
2020 թվականի սուբվենցիոն ծրագրով շուրջ 110 միլիոն դրամ է հատկացվել, որով անկախության հաստատումից հետո գործունեությունը դադարեցրած հին մանկապարտեզի շենքն ամբողջությամբ վերանորոգվել է: Ֆինանսավորման 50%-ը հատկացվել է կառավարության կողմից, 50%-ը՝ համայնքի բյուջեից:
2021 թվականի սուբվենցոն ծրագրով այժմ ընթանում են բակի բարեկարգման, գույքի և տեխնիկայի ձեռքբերման աշխատանքները. այս նպատակով կառավարությունը կրկին պետական բյուջեից համայնքին գումար կհատկացնի:
Ծրագրի արժեքը շուրջ 50 միլիոն դրամ է, որի 45%-ը կհատկացնի կառավարությունը, 55%-ը՝ համայնքի ներդրումն է. համայնքի բյուջեից իրականացվող ֆինանսավորման չափաբաժնում առկա է նաև համայնքի բնակիչների ներդրումը՝ վճարված հարկերի տեսքով:
2022 թվականին հարմարավետ մանկապարտեզն իր դռները կբացի շուրջ 50 երեխայի առաջ. այստեղ կարող են հաճախել ինչպես Արագածոտնի, այնպես էլ հարակից գյուղերի երեխաները:
Սուբվենցիոն ծրագրերն իրականացվում են ՀՀ կառավարության և տվյալ համայնքի համաֆինանսավորմամբ՝ ՀՀ տարածքային կառավարման և ենթակառուցվածքների նախարարության և Արագածոտնի մարզպետարանի հետ համատեղ: