Արագածոտնի մարզպետի աշխատակազմ

Արագածոտնի մարզի համայնքների տնտեսական և սոցիալական ենթակառուցվածքների զարգացմանն ուղղված 2020 թվականի սուբվենցիոն ծրագրի շրջանակում Շղարշիկ համայնքում կկառուցվի փողոցների գիշերային լուսավորության համակարգ:

Նորակառույց շուրջ 2կմ երկարությամբ լուսավորության ցանցն անցնելու է համայնքի 2 կենտրոնական փողոցներով: Նախկինում տեղադրված, սակայն չշահագործված սյուները վերանորոգվելու են, տեղադրվելու են 30 նոր սյուներ և 52 էներգոխնայող լուսադիոդային լամպեր:

Նշենք, որ Շղարշիկ համայնքը մինչ այժմ լուսավորության ցանց չի ունեցել, և աշխատանքների ավարտից հետո գիշերային ժամերին համայնքը շուրջ 60%-ով լուսավորված կլինի:

Ծրագրի իրականացման համար անհրաժեշտ գումարի 65%-ը ՀՀ կառավարությունն է համաֆինանսավորելու, 35%-ը կներդնի համայնքը:

Սուբվենցիոն ծրագրերի շրջանակներում համայնքային նշանակության խնդիրները լուծելու մասին որոշումը կայացվել է տվյալ համայնքի ավագանու կողմից՝ հաշվի առնելով բնակիչների կարծիքը և խնդիրների առաջնահերթությունը: Արագածոտնի մարզում իրականացվող սուբվենցիոն մյուս ծրագրերի մասին կտրամադրվի լրացուցիչ տեղեկատվություն:

Սուբվենցիոն ծրագրերն իրականացվում են ՀՀ կառավարության և տվյալ համայնքի համաֆինանսավորմամբ՝ ՀՀ տարածքային կառավարման և ենթակառուցվածքների նախարարության և Արագածոտնի մարզպետարանի հետ համատեղ: