Արագածոտնի մարզպետի աշխատակազմ

Այսօր կայացավ ՀՀ Արագածոտնի մարզի հաշմանդամություն ունեցող անձանց հարցերով զբաղվող մարզային հանձնաժողովի նիստը, որը վարում էր ՀՀ Արագածոտնի մարզպետ, հանձնաժողովի նախագահ Դավիթ Գևորգյանը:
Նիստի ընթացքում քննարկվել են մարզում համընդհանուր ներառական կրթության ներդրման ուղղությամբ իրականացված աշխատանքները, ներկայացվել է գործընթացում առաջացած խնդիրների վերաբերյալ վերլուծություն:
2019-2020 ուսումնական տարում ՀՀ Արագածոտնի մարզի հանրակրթական ուսումնական հաստատություններն ընդգրկվել են համընդհանուր ներառական կրթության մեջ:
Աշտարակի թիվ 1 հատուկ դպրոցի 40 աշակերտից 26-ը կրթությունը շարունակում է Արագածոտնի մարզի հանրակրթական ուսումնական հաստատություններում, մյուսները՝ մայրաքաղաքում և այլ մարզերում: Կրթության առանձնահատուկ պայմանների կարիք ունեցող 91 վկայագրված երեխայի համար մարզի 27 դպրոցում իրականացվում է ներառական կրթություն, 5 աշակերտի համար՝ տնային ուսուցում: Դպրոցները համալրվել են հոգեբանի, լոգոպեդի, սոցիալական մանկավարժի, հատուկ մանկավարժի և այլ անհաժեշտ հաստիքներով:
Որպես առաջնահերթ խնդիր քննարկվել է կրթության առանձնահատուկ կարիքներ ունեցող երեխաների հետ աշխատող մանկավարժների վերապատրաստման հարցը: Մարզպետ Դավիթ Գևորգյանը նշել է, որ վերապատրաստման ժամանակացույցը պետք է կազմել այնպես, որ մինչև հաջորդ ուսումնական տարվա մեկնարկը բոլոր անհրաժեշտ մասնագետները լինեն վերապատրաստված:
Ոլորտային պատասխանատուներին մարզպետը հանձնարարել է դպրոցներում շարունակել իրականացնել շենքային պայմանների մոնիթորինգ և ներկայացնել առաջնահերթ լուծում պահանջող խնդիրները՝ թեքահարթակների, հարմարեցված դռների, սանհանգույցների և անհրաժեշտ այլ պայմանների վերաբերյալ:
Մարզպետը կրկին հորդորել է բացառել երեխաների կրթությունից դուրս մնալու դեպքերը, իսկ վկայագրումից խուսափող ծնողների հետ տանել անհատական բացատրական աշխատանքներ:
Ամփոփվել է նաև Արագածոտնի մարզում հաշմանդամություն ունեցող անձանց զբաղվածությունն ապահովելու համար տարվող աշխատանքների ընթացքը: Քննարկվել են այս ուղղությամբ իրականացվող պետական աջակցության ծրագրերը, անդրադարձ է կատարվել դրանց ազդեցության արդյունավետության բարձրացմանը: