Արագածոտնի մարզպետի աշխատակազմ

ՀՀ Արագածոտնի մարզպետարանում այսօր կայացավ մարզխորհրդի 2019 թվականի առաջին նիստը, որը վարեց ՀՀ Արագածոտնի մարզպետ, մարզի խորհրդի նախագահ Դավիթ Գևորգյանը։
Մարզխորհրդի նիստին հրավիրվել և մասնակցում էին նաև ՀՀ Արագածոտնի մարզի դատախազ Սարգիս Մնացականյանը, մարզի զինվորական կոմիսար Անուշավան Ասատրյանը, ՀՀ ԱԻՆ ՓԾ Արագածոտնի ՄՓՎ պետ Էդգար Գալստյանը:
Նախքան օրակարգային հարցերի քննարկմանն անցնելը, անդրադարձ կատարվեց հանրային կարևորություն ունեցող մի շարք խնդիրների:
Մարզի դատախազ Սարգիս Մնացականյանը ներկայացրեց վերջին շրջանում բնակարանային գողության դեպքերի աճի դինամիկան և դրա դեմ ՀՀ գլխավոր դատախազության կողմից տարվող պայքարի միջոցառումները: Սեփականության անձեռնմխելիության խախտման և բնակարանային գողության դեպքերի կանխարգելման նպատակով նախատեսվում է բազմաբնակարան շենքերի մուտքերին տեղադրել փականներ: Բացի այդ, նախատեսվում է ճանապարհներին տեղադրել տեսախցիկներ՝ տեղանքում շարժը վերահսկելու և կատարված դեպքերի բացահայտման նպատակով: Գործընթացը լիարժեք կազմակերպելու համար մարզպետն առաջարկել է համայնքի ղեկավարներին ապահովել համայնք-ոստիկանություն համագործակցությունը և մինչև ապրիլի 20-ը ներկայացնել տեղեկատվություն տեսախցիկների անհրաժեշտ քանակի և տեղադրման վայրերի վերաբերյալ:
ՀՀ ԱԻՆ ՓԾ Արագածոտնի ՄՓՎ պետ Էդգար Գալստյանը ներկայացրեց համայնքներում կամավորական հրշեջ-փրկարարական ջոկատների կազմավորման անհրաժեշտության հարցը: Կամավորական ՀՓՋ-ների ձևավորումը կնպաստի գրանցված հրդեհների կամ այլ դեպքերի արագ արձագանքմանը:
Մարզի զինվորական կոմիսար Անուշավան Ասատրյանը զեկուցեց պաշտպանության բնագավառի հետ կապված մի շարք հարցեր: ՀՀ Արագածոտնի մարզպետ Դավիթ Գևորգյանը համայնքների ղեկավարներին հորդորեց խիստ հետևողական լինել երկրի պաշտպանությանն առնչվող ցանկացած հանձնարարականի լիարժեք կատարմանը և իրենց լիազորությունների սահմաններում աջակցել զորահավաքային միջոցառումների իրականացմանը:
Վերոնշյալ հարցերի քննարկումից հետո խորհուրդն անդրադարձավ օրակարգային հինգ հիմնական հարցի:
Արագածոտնի մարզում 2019 թվականի առաջին եռամսյակի համայնքային բյուջեների սեփական եկամուտների հավաքագրման արդյունքների հարցի շուրջ զեկուցումով հանդես եկավ մարզպետի տեղակալ Գառնիկ Աթանեսյանը: 2019 թվականի ծրագրով նախատեսված է սեփական եկամուտների 1 մլրդ 509 մլն դրամի հավաքագրում, որը նախորդ տարվա պլանավորվածից ավել է 71 մլն-ով /5%/ :
2019թ. առաջին եռամսյակում սեփական եկամուտները կազմել են 269մլն 762 հազար դրամ, որը նախորդ տարվա նույն ժամանակահատվածի համեմատ ավել է 42 մլն դրամով կամ 2 %-ով:
Բոլոր հարկատեսակների մասով հավաքագրման ցուցանիշը նախորդ տարվա նույն ժամանակահատվածի համեմատ աճել է: Հավաքագրման ցուցանիշի 1.3% նվազում է գրանցվել միայն հողի հարկի գծով, որը նախատեսվում է լրացնել հաջորդ եռամսյակում:
Ներկայացվել են սեփական եկամուտների հավաքագրման պլանային ցուցանիշից էական բացասական և դրական շեղում ունեցող համայնքները:
Մարզպետ Դավիթ Գևորգյանը խորհրդի անդամներին տեղեկացրեց, որ համայնքի ղեկավարի հնարավորություններից վեր գտնվող խնդիրների լուծման նպատակով ՀՀ կառավարության կողմից տարվում են հետևողական աշխատանքներ: Եկամուտների հավաքագրմանը խոչընդոտող խնդիրները գույքագրվել են և ներկայացվել են համապատասխան մարմիններին՝ իրավիճակային կոնկրետ լուծումներ սահմանելու նպատակով: Աշխատանքներն անխափան իրականացնելու համար անհրաժեշտ է համայնքի ղեկավարից պահանջվող տեղեկատվությունը ներկայացնել սահմանված ժամկետում` ձևաչափին համապատասխան և ճշգրիտ:
Մարտի 23-ին տեղի ունեցած համապետական շաբաթօրյակի արդյունքներն ամփոփեց մարզպետարանի քաղաքաշինության վարչության պետ Աշոտ Դավայանը:
Կարևորելով սանիտարական մաքրության դերը` մարզպետ Դավիթ Գևորգյանը առանձնացրել է շաբաթօրյակին առավել ակտիվ մասնակցություն ունեցած համայնքները: Նա նաև նշել է, որ շաբաթօրյակների կազմակերպումը պետք է կրի շարունակական բնույթ և անհրաժեշտ է ձևավորել համայնքի բնակչի կողմից իր իսկ բնակավայրը մաքուր պահելու մշակույթը: Հաճախ ներդրողներն ու զբոսաշրջիկները, առերեսվելով համայնքներում կուտակված աղբակույտերին, հրաժարվում են դիտարկել մարզը որպես զբոսաշրջային և ներդրումային բարենպաստ միջավայր: Մարզպետը շեշտել է, որ անհրաժեշտ է կազմակերպել ճամփեզրերին կուտակված մեքենաների մետաղական մնացորդների տեղափոխումը:
Քննարկվել է 2019 թվականի Արագածոտնի մարզի համայնքների տնտեսական և սոցիալական ենթակառուցվածքների զարգացմանն ուղղված սուբվենցիայի տրամադրման հայտերի ընթացքը: Տեղեկացվել է, որ ներկայացված 64 ծրագրային հայտերից 41-ում հայտնաբերվել են փաստաթղթային թերություններ: Մարզպետը ոլորտային պատասխանատուներին հանձնարարել է համագործակցված աշխատանքներ տանել համայնքների հետ, կազմել փաստաթղթերի ճշգրտված փաթեթները և սահմանված կարգով ներկայացնել քննարկման:
Մարզպետ Դավիթ Գևորգյանը անդրադարձել է «Իմ քայլը հանուն Արագածոտնի մարզի» ներդրումային համաժողովի կազմակերպմանը: Նա համայնքների ղեկավարներին առաջարկել է մարզպետարանի ոլորտային պատասխանատուների հետ քննարկել համայնքում առկա ներուժը համաժողովին ներկայանալի դարձնելու վերաբերյալ իրենց գաղափարները:
Հաշվի առնելով, որ համաժողովին մասնակցելու են ինչպես Հայաստանում և արտերկրում գործունեություն իրականացնող ծագումով հայ գործարարներ, այնպես էլ օտարերկրացի ներդրողներ, ուստի առկա պոտենցիալը ճիշտ ներկայացնելու դեպքում համայնք ներդրումներ ուղղորդելու համար ստեղծված է իրական հնարավորություն:
Մարզպետը խոսել է ապրիլի 27-ը Քաղաքացու օր հռչակելու ՀՀ կառավարության որոշման մասին:
Տոնն այս տարի նշվում է առաջին անգամ: Տոնական միջոցառումները չեն կենտրոնացվելու մայրաքաղաքում: Նախատեսված ֆինանսական միջոցները ուղղվելու են մարզերում միջոցառումների կազմակերպմանը: Արագածոտնի մարզում գլխավոր միջոցառումը կկայանա մարզկենտրոն Աշտարակում, որին կմասնակցեն մարզի բոլոր տարածաշրջանների բնակիչները:
Մարզպետը համայնքի ղեկավարներին առաջարկել է ապահովել միջոցառման հրապարակայնությունը և դրա մասին ակտիվորեն իրազեկել բնակիչներին:
Միջոցառան շրջանակներում այդ օրը կիրականացվի ծառատունկ:
Հնչեցին հայտարարություններ գյուղատնտեսական օրախնդիր հարցերի, հողերի տրամադրման գործընթացի վերաբերյալ:
Մարզպետը խոսել է հողերի օտարման գործընթացի, աճուրդների հրապարակայնության ապահովման և ապօրինի շինարարության դեմ տարվող պայքարի մասին: Այս հարցերի շուրջ նա ասել է. «Անհրաժեշտ է բացառել կադաստրային արժեքից ցածր գնով հողերի աճուրդ կազմակերպելու պրակտիկան: Աճուրդների մասին լայն իրազեկում և հնարավորինս շատ մասնակիցների ներգրավելու նպատակով անհրաժեշտ է հայտարարություններն ուղարկել մարզպետարան՝ մարզպետարանի կայքով և սոցիալական ցանցերի պաշտոնական էջերով տարածելու նպատակով: Իսկ ապօրինի շինարարության նկատմամբ լինելու եմ անզիջում: Անհրաժեշտ է հրաժարվել այն արատավոր պրակտիկայից, երբ շինությունը արդեն իսկ կառուցվելուց հետո է միայն բերվում օրինական դաշտ: Քանդման գործընթացներից խուսափելու համար անհրաժեշտ է հետևողական լինել կառուցապատողի կողմից շինարարական թույլտվություն և օրինական այլ հիմքեր ապահովելու համար» :
Նիստի ավարտին հնչել է հարցուպատասխան: