Նորություններ
Իրականացվում է «Վարձատրվող հասարակական աշխատանքների կազմակերպման միջոցով գործազուրկների ժամանակավոր զբաղվածության ապահովման» ծրագիրը
21.01.2019
«Վարձատրվող հասարակական աշխատանքների կազմակերպման միջոցով գործազուրկների ժամանակավոր զբաղվածության ապահովման» ծրագրի շրջանակներում ՀՀ կառավարության որոշմամբ Արագածոտնի մարզի Աշտարակի տարածաշրջանին հատկացվել է 4.500.000 ՀՀ դրամ:
Ֆինանսավորման ենթակա են համայնքում սոցիալական ենթակառուցվածքների օբյեկտների (դպրոց, մանկապարտեզ, բժշկական հաստատություն, բնակչության սոցիալական պաշտպանության հաստատություն, մշակույթի տուն և դրանց հարակից տարածքներ) վերանորոգման, պետական պատմական հուշարձանների, թանգարանների, եկեղեցիների հարակից տարածքների, միջհամայնքային և ներհամայնքային ճանապարհների, խճուղիների, մայթերի, այգիների, պուրակների, խաղահրապարակների բարեկարգման, գերեզմանատների ցանկապատման, արտակարգ իրավիճակների հետևանքների վերացման, բնակչության համար պաշտպանական նշանակություն ունեցող ինժեներական կառույցների շինարարական աշխատանքների իրականացման նպատակով ներկայացված ծրագրերը: Սանիտարական մաքրման աշխատանքները ծրագրում չեն ներառվում:
Աշտարակի տարածաշրջանի համայնքների ղեկավարները ծրագրի հայտ-առաջարկը ՀՀ Արագածոտնի մարզպետարան կարող են ներկայացնել մինչև 2019 թվականի հունվարի 29-ը:
Հանձնաժողովի կողմից հաստատվելու է երեք ծրագիր, որոնցում աշխատանքի ընդունվելու առաջնահերթություն է նախատեսված աշխատաշուկայում անմրցունակ այն անձանց համար, որոնց.
ա. ընտանիքը հաշվառված է ընտանիքների անապահովության գնահատման համակարգում և ստանում է ընտանեկան/սոցիալական նպաստ,
բ. ընտանիքում առկա է հաշմանդամություն ունեցող անձ(անձինք) կամ երկու և ավելի անչափահաս,
գ. ովքեր ունեն արտագնա աշխատանքի մեկնելու ռիսկ: