Նորություններ
Հրշեջ – փրկարարական տեխնիկայի, բժշկական, կենսաապահովման միջոցների և պաշարների, ճառագայթային և քիմիական կենտրոնի գույքի ցուցադրություն
07.12.2018
Սպիտակի երկրաշարժի 30-րդ տարելիցին նվիրված՝ «Աղետների դիմակայության օր» միջոցառումների շրջանակում ՀՀ Արագածոտնի մարզպետարանը և մարզային փրկարարական վարչությունը կազմակերպել էին hրշեջ – փրկարարական տեխնիկայի, բժշկական, կենսաապահովման միջոցների և պաշարների, ճառագայթային և քիմիական կենտրոնի գույքի ցուցադրություն:
Ցուցադրության վայր էր ընտրվել մարզկենտրոն Աշտարակի Ն. Աշտարակեցու անվան հրապարակը: ՀՀ Արագածոտնի մարզպետի տեղակալ Գառնիկ Աթանեսյանը և մարզային փրկարարական վարչության պետ Կարապետ Մարգարյանն այցելեցին հրապարակ և ծանոթացան արդիական սարքավորումներին, ժամանակակից չափանիշերին համապատասխան ցուցադրություններին:
Ներկայացված էր ռուս-հայկական մարդասիրական արձագանքման կենտրոնից 2018 թվականին ստացված գույքը՝ հրշեջ ավտոմեքենա Կամազ, շարժական հրշեջ մոտոպոմպ, էլեկտրակայան, 1000 լիտր ծավալով ջրի բաք, վթարա-փրկարարական գործիքների ունիվերսալ լրակազմ, վրաններ, հրշեջի ջերմաանդրադարձիչ հանդերձանք, հիդրավլիկ գործիքների հավաքածու, լուսային աշտարակ և անհրաժեշտ այլ սարքավորումներ:
Ցուցադրությունը հրապարակում տեղակայված է լինելու մինչեւ օրվա ավարտը, և հանրությունը հնարավորություն կունենա ծանոթանալու արտակարգ իրավիճակներում մարզային փրկարարական վարչության գործունեության ողջ ներուժին ու կարողություններին: