Արագածոտնի մարզպետի աշխատակազմ

2018 թվականի ամառային զորակոչի մեկնարկին ընդառաջ ՀՀ Արագածոտնի մարզպետարանի եւ Աշտարակի տարածքային զինկոմիսարիատի նախաձեռնությամբ կազմակերպվել էր հանդիպում տարածաշրջանից բանակ զորակոչվող նորակոչիկների եւ նրանց ծնողների հետ:
Մարզպետի տեղակալ Մուշեղ Աբգարյանը ներկայացրեց, որ հանդիպման նպատակը բանակի եւ բնակչության կապի ամրապնդումն է: Բանակում ներկայումս բարեփոխումներ են ընթանում, որի շրջանակում իրականացվում են ,, Ես եմ,, եւ ,,Պատիվ ունեմ,, ծրագրերը,,: Աշտարակի տարածաշրջանից ,,Ես եմ,, ծրագրով այժմ 7 զինծառայող կա, ովքեր այս օրերին իրենց առաջին արձակուրդն են վայելում:
Աշտարակի զինկոմ, գնդապետ Մ. Ղազարյանը մանրամասնորեն ներկայացրեց ,,Ես եմ,, ծրագրի առանձնահատկությունները: Նշվեց, որ այս ծրագիրն ընտրած զինակոչիկը չի մասնակցում վիճակահանությանը, այլ նրա հետ պայմանագիր է կնքվում, որն իրավական ուժ ունի: Նրանք մարտական հերթափոխության անցնում են ծառայությունը սկսելուց 6 ամիս անց՝ նախնական զինվորական պատրաստությունից հետո: Այս ծրագիրն ընտրած զինծառայողների ծառայության ժամկետը 3 տարի է, որի ընթացքում յուրաքանչյուր ամսվա 7 օրը նրանք խրախուսական արձակուրդով տուն են ժամանում: Ընդ որում՝ փոխհատուցվում է նրանց ճանապարհածախսը: Զինկոմիսարը մի շարք այլ արտոնությունների մասին տեղեկացրեց, որի մեջ առանձնացրեց այն, որ զորացրումից հետո յուրաքանչյուր զինծառայողի հաշվին 5 մլն. դրամի չափով գումար է փոխանցվում:
Ներկաներին մանրամասնորեն ներկայացվեց նաեւ ,, Պատիվ ունեմ ,, ծրագիրը, նշվեց դրա յուրահատկություններն ու առավելությունները:
Ներկաները դիմեցին ներկայացված ծրագրերի, ինչպես նաեւ ընդհանրապես զինծառայության հետ կապված մի շարք հարցերով եւ ստացան սպառիչ պատասխաններ: