Նորություններ
Օշականում նշվեց Մայրենի լեզվի օրը
21.02.2018
Փետրվարի 21-ին Օշականի Սբ. Մեսրոպ Մաշտոց եկեղեցու դպրատանը կազմակերպվեց Մայրենի լեզվի օրվան նվիրված միջոցառում: ՀՀ սփյուռքի նախարարության եւ Արագածոտնի մարզպետարանի նախաձեռնությամբ կազմակերպվող այս միջոցառումը արդեն տարիների պատմություն ունի, որի ընթացքում բարի ավանդույթներ են ձեւավորվել:
Տոնի մասնակիցներն այցելեցին Մեսրոպ Մաշտոցի շիրմին, իրենց հարգանքի տուրքը մատուցեցին եւ ծաղիկներ խոնարհեցին:
Այնուհետև Օշականի Մեսրոպ Մաշտոցի անվան դպրոցի աշակերտների եւ Երևանի Մխիթար Հերացու անվան պետական բժշկական համալսարանի օտարազգի ուսանողների մասնակցությամբ տեղի ունեցավ տոնակատարությունը:
Միջոցառումը սկսվեց Օշականի Սբ.Մեսրոպ Մաշտոց եկեղեցու հոգեւոր հովիվ Տեր Վիգեն քահանա Մանուկյանի աղոթքով եւ օրհնությամբ:
Ներկաներին ողջունեց սփյուռքի նախարար Հրանուշ Հակոբյանը: Նա նշեց, որ Օշականը սրբատեղի է հայ ժողովրդի համար եւ գրկաբաց ընդունում է բոլոր հայերին: Շնորհակալություն հայտնելով մարզի ղեկավարությանը՝ նա հավելեց, որ լեզվի պահպանությունը հայապահպանության գրավականն է, եւ հորդորեց հատկապես սփյուռքի հայությանը, բոլոր մայրերին՝ երեխաների հետ խոսել միայն հայերեն:
Օշականի դպրոցի աշակերտները փոքրիկ բեմադրություն ներկայացրին մայրենի լեզվի, Մեսրոպ Մաշտոցի մասին, հանդես եկան գեղարվեստական կատարումներով: Ելույթ ունեցան նաեւ Երեւանի Մխիթար Հերացու անվան պետական բժշկական համալսարանի հնդիկ, պարսիկ եւ սփյուռքահայ ուսանողները: