Արագածոտնի մարզպետի աշխատակազմ

Արագածոտնի մարզպետ Աշոտ Սիմոնյանի մոտ հրավիրված ընդլայնված խորհրդակցությունը նվիրված էր ՀՀ ԱԻՆ Արագածոտնի մարզում տեղակայված ստորաբաժանումների 2017 թվականի գործունեության ամփոփմանը: Ներկա էին ՀՀ ԱԻՆ ,,Տեխնիկական անվտանգության ազգային կենտրոն,, ՊՈԱԿ-ի տնօրեն Վ. Գեւորգյանը, ՀՀ ԱԻՆ ՓԾ տնօրենի տեղակալ, փ/ծ գնդապետ Հ. Եմիշյանը:
ՀՀ ԱԻՆ Փրկարար ծառայության Արագածոտնի մարզային փրկարար վարչության 2017 թվականին կատարած աշխատանքների մասին զեկույցը ներկայացրեց ՄՓՎ ճգնաժամային կառավարման բաժնի պետ Հ. Դարբինյանը: (Զեկույցն ամբողջությամբ տեղադրված է մարզպետարանի պաշտոնական կայքի Ծրագրեր եւ գերակա խնդիրներ բաժնի Արտակարգ իրավիճակների կանխարգելմանը եւ վերացմանը ուղղված միջոցառումներ ենթաբաժնում):
Նշվեց, որ 2017թ. հաշվետու ժամանակահատվածում Արագածոտնի ՄՓՎ օպերատիվ խումբը եւ ենթակա ստորաբաժանումները արձագանքել են 766 դեպք-պատահարների: 2016 թվականին այդ թիվը կազմել է 781 եւ 1.9 %-ով ավելին է եղել: Դեպքերի հետեւանքով զոհվել է 12, մարմնական վնասվածքներ ստացել 90 մարդ: Հրդեհների թիվը նախորդ տարվա համեմատ աճել է 72-ով կամ (35,1%-ով): Հրդեհների հետևանքով զոհեր չկան, այրվածքներ է ստացել 2 քաղաքացի:
Ներկաները մանրամասն տեղեկություններ ստացան նաեւ բնակչության պաշտպանության համակարգի օպերատիվ նախապատրաստման, քաղաքացիական պաշտպանության համակարգի նախապատրաստման, կապի եւ ազդարարման համակարգի, կանխարգելիչ միջոցառումների իրականացման, հրշեջ-փրկարարական ուժերի պատրաստականության բարձրացման, ծառայության կազմակերպման, անձնակազմի կառավարման եւ այլ ուղղություններով կատարված աշխատանքների մասին:
Արծարծված հարցերի շուրջ կատարվեցին քննարկումներ: Մասնավորապես, առանձնացվեց ազդարարման գործընթացի կարեւորությունը եւ այդ գործում համայնքներում առկա շչակների եւ այլ սարքավորումների թարմացման հարցը: Կարեւորվեցին նաեւ հակահրդեհային տեխնիկական միջոցների արդիականացման, համայնքապետարաններում եւ դպրոցներում աղետների ռիսկերի ուսումնասիրության եւ գնահատման, համայնքապետերի եւ ՄՓՎ-ի միջեւ առկա համագործակցված աշխատանքի անհրաժեշտության եւ այլ հարցեր:
Ներկաները լսեցին նաեւ մարզային հրդեհային եւ տեխնիկական անվտանգության տեսչության, ,,Տեխնիկական անվտանգության ազգային կենտրոն,, , ,,Սեյսմիկ պաշտպանության արեւմտյան ծառայություն,, , ,,Հիդրոօդերեւութաբանական եւ մթնոլորտային երեւույթների վրա ակտիվ ներգործության ծառայություն,, ՊՈԱԿ-ների ղեկավարների զեկույցները: Քննարկված հարցերի շուրջ մասնակիցներն իրենց հարցադրումներն ու դիտարկումներն արեցին:
Ամփոփելով զեկույցում բարձրացված հարցերը, մարզպետ Աշոտ Սիմոնյանը առաջարկեց դրանցում առանձնացնել այն խնդիրները, որոնց լուծումը ենթադրում է մարզի ղեկավարության աջակցությունը եւ մարզպետարանի պատասխանատուներին տվեց համապատասխան հանձնարարականներ:
Անդրադառնալով ներկայացված զեկույցներին, ՀՀ ԱԻՆ ՓԾ տնօրենի տեղակալ, փ/ծ գնդապետ Հ. Եմիշյանը առանձնակի կարեւորեց Բյուրականի անտառների հրդեհաշիջման դժվարին եւ պատասխանատու աշխատանքը եւ շնորհակալություն հայտնեց մարզպետին, ՄՓՎ-ին, մարզային, համայնքային այլ կառույցներին, ողջ ազգաբնակչությանը՝ համատեղ եւ միասնական գործունեության համար:
Աշոտ Սիմոնյանը եւս շնորհակալ եղավ համագործակցության համար եւ նշեց, որ առաջիկա պլանները պետք է այնպես կազմվեն, որպեսզի շեշտը դրվի կանխարգելիչ միջոցառումների վրա, ինչը որ գործունեության հաջողության լավագույն գրավականն է: