Նորություններ
ՏԿԶ նախարարը եւ Արագածոտնի մարզպետը հանդիպեցին Ապարանի տարածաշրջանի համայնքապետերի հետ
14.06.2017
ՀՀ տարածքային կառավարման եւ զարգացման նախարար Դավիթ Լոքյանը եւ Արագածոտնի մարզպետ Գաբրիել Գյոզալյանը այցելեցին Ապարանի տարածաշրջան: Արագած համայնքի մշակույթի տանը կայացավ ընդլայնված խորհրդակցություն, որին ներկա էին ՏԿԶՆ աշխատակազմի տեղական ինքնակառավարման վարչության պետ Աշոտ Գիլոյանը, տարածաշրջանի հարակից համայնքների ղեկավարները:
Քննարկման հիմնական թեման Հայաստանում վարչատարածքային բարեփոխումների ծրագիրն էր, որի վերաբերյալ տրվեցին պարզաբանումներ, ներկայացվեցին խոշորացման ծրագրի սկզբունքներն ու մոտեցումները: Նշվեց, որ խոշորացման արդյունքում ավելի վերահսկելի եւ թափանցիկ կլինի ավագանիների գործունեությունը: Համայնքների միավորումը հնարավորություն կտա բարձրացնելու տեղական ինքնակառավարման մարմինների աշխատանքի արդյունավետությունն ու թափանցիկությունը եւ միտված է ՏԻՄ-երի կարողությունների զարգացմանը:
Անդրադարձ եղավ նաեւ համայնքներում առկա այլ հիմնախնդիրների: Մասնավորապես, քննարկվեցին համայնքային ճանապարհներին, խմելու եւ ոռոգման ջրի մատակարմանը, ենթակառուցվածքների գործունեությանը, գյուղմթերքների իրացմանը եւ հանրային նշանակության այլ խնդիրներ: Դրանց վերաբերյալ համայնքապետերի կողմից հնչեցին հարցեր եւ ստացան ահնհրաժեշտ պարզաբանումներ:
Նախարարը եւ մարզպետը շրջայց կատարեցին համայնքում, զրուցեցին բնակիչների հետ: Այցելություն կատարվեց նաեւ մանկապարտեզ եւ դպրոց, որտեղ այս հաստատությունների աշխատակիցների կողմից բարձրացվեցին վարչատարածքային բաժանման հետ կապված մի շարք հարցեր: Նախարարն ասաց, որ այդ հարցադրումները կքննարկվեն ինչպես մարզպետի հետ, այնպես էլ նախարարությունում եւ կստանան համապատասխան լուծումներ: