Արագածոտնի մարզպետի աշխատակազմ

Հուլիսի 4-ին լրացավ Արցախյան ազատամարտի նվիրյալ, Թաթուլ գյուղի 3 քաջազուն զավակներից մեկի, Հայ հեղափոխական դաշնակցության անդամ Սամվել Ռոմիկի Կարապետյանի ծննդյան 50-րդ տարեդարձը: ՀՀ պաշտպանության նախարարության, Արագածոտնի մարզպետարանի նախաձեռնությամբ հոբելյանը մեծ շուքով նշվեց նրա ծննդավայրում` Թաթուլ համայնքում:
Մարզպետը, ՀՀ ՊՆ ներկայացուցիչները, միջոցառման հրավիրյալները այցելեցին Սամվել Կարապետյանի հայրական տուն, այնուհետեւ ծաղկեպսակներ տեղադրեցին ՀՀ Ազգային հերոս Թաթուլ Կրպեյանի, զոհված ազատամարտիկներ Սամվել Կարապետյանի և Հարություն /Արթուր/ Բաղդասարյանի հիշատակին նվիրված հուշահամալիրում:
Արարողությունը շարունակվեց շիրիմներն ամփոփող համալիրի մոտ: Ներկայացվեց Սամվել Կարապետյանի կենսագրությունը եւ նրա դերն ու կատարած սխրանքները Արցախյան ազատամարտում, ինչի համար Սամվել Կարապետյանը ՀՀ նախագահի կողմից պարգևատրվել է Հայաստանի Հանրապետության Արիության մեդալով, իսկ ԼՂՀ նախագահի կողմից` ԼՂՀ ,,Շուշիի ազատագրման համար,, մեդալով և ԼՂՀ ,,Մարտական Խաչ,, 2-րդ աստիճանի շքանշանով :
Իր ելույթում Գաբրիել Գյոզալյանը հպարտությամբ նշեց, որ Հայաստանի Հանրապետության 15 Ազգային Հերոսներից 2-ը` Գեղազնիկ Միքայելյանը և Թաթուլ Կրպեյանը, Արագածոտնի մարզից են: Նրանցից իրենց քաջությամբ ու հերոսությամբ քիչ են տարբերվում այստեղ` իրենց հայրենի հողում հանգչող Սամվել Կարապետյանն ու Արթուր Բաղդասարյանը: Այս հուշահամալիրում ննջող 3 հերոսներն էլ Հայ հեղափոխական դաշնակցության անդամներ են եղել: Ապրիլյան քառօրյա հայրենական պատերազմը վերստին ապացուցեց, որ ոչ միայն Գեղազնիկ Միքայելյանի, Թաթուլ Կրպեյանի, Սամվել Կարապետյանի և Արթուր Բաղդասարյանի, այլ Արցախյան բոլոր ազատամարտիկների հերոսական ոգին փոխանցվել է նոր սերնդին, ովքեր ոչ պակաս խիզախությամբ անառիկ պահեցին ազատագարված Արցախի հերոսական հողը: Շնորհավորելով Սամվել Կարապետյանի ծննդյան 50 ամյակը` մարզպետը երախտիքի խոսք ուղղեց հերոսի ծնողներին, հարազատներին, ընկերներին և Թաթուլ գյուղի ողջ հասարակությանը:
Միջոցառման ավարտին հնչեցին հայրենասիրական երգերի ու պարերի կատարումներ: