Նորություններ
Մարզպետ Գաբրիել Գյոզալյանին ընդունեց Ամենայն Հայոց Կաթողիկոս Գարեգին Երկրորդը
05.04.2016
Ապրիլի 5-ին ՀՀ Արագածոտնի մարզպետ Գաբրիել Գյոզալյանը Արագածոտնի թեմի առաջնորդ Տ. Մկրտիչ եպս. Պռոշյանի ուղեկցությամբ այցելեց Մայր աթոռ սուրբ Էջմիածին, որտեղ նրան ընդունեց Ամենայն Հայոց Կաթողիկոս Գարեգին Երկրորդը:
Վեհափառը նշեց, որ ուրախ է մարզպետին վերստին տեսնելու այդ պաշտոնում եւ նշեց, որ նա քաջածանոթ է նախկին պաշտոնավարման ընթացքում նրա իրականացրած գործունեության մասին: Նա իր օրհնանքի խոսքն ու բարեմաղթանքը հղեց մարզպետին, բեղմնավոր եւ արդյունավետ աշխատանք կամեցավ:
Զրույցը շարունակվեց Արցախում ծավալվող իրադարձությունների շուրջ: Գաբրիել Գյոզալյանը տեղեկացրեց, որ դեպի առաջին գիծ մեկնող կամավորների եւ զինվորականների մեջ մեծ է Արագածոտնի մարզից մեկնածների թիվը: Ընթանում են նաեւ բարոյական, նյութական աջակցության աշխատանքներ:
Վեհափառը հետաքրքրվեց մարզից զոհված զինծառայողների, նրանց ընտանիքների մասին: Նրա կողմից Արագածոտնի թեմի առաջնորդին հանձնարարական եղավ` հոգեւորականների մասնակցությամբ աջակցել զոհվածների եւ ճակատում գտնվող զինվորների ու կամավորների ընտանիքներին:, այցելություն կատարել Արցախ:
Վեհափառը վստահեցրեց, որ եկեղեցին իր ամենօրյա աղոթքներն է հղում առ աստված` նահատակված զինվորների հոգիների համար: