Արագածոտնի մարզպետի աշխատակազմ

Արագածոտնի մարզի 119-ը հանրակրթական եւ Աշտարակի, Թալինի, Ապարանի ավագ դպրոցները մայիսի 23-ին տոնական հանդերձանքի մեջ էին: Հանդիսավոր պայմաններում հնչեց վերջին զանգը, որն ազդարարեց շրջանավարտների մուտքը դեպի մեծ կյանք:
Յուրաքանչյուր դպրոց յուրովի էր նախապատրաստվել այդ հանդիսավոր արարողությանը: Բոլոր կրթօջախներում այն սկսվեց մարզպետ Սարգիս Սահակյանի ողջույնի ուղերձի հղումով, որն ընթերցեցին դպրոցներ այցելած մարզպետարանի ներկայացուցիչները: Ուղերձում մասնավորապես ասվում է . ,, Սիրելի շրջանավարտնե՛ր, այսօր տոնական օր է ձեզ համար: Դուք ավարտում եք դպրոցը և մուտք եք գործում կյանքի նոր շրջան: Սկսվում են ձեր երազանքների իրականացման, մեծ և կարևորագույն խնդիրների լուծման տարիները:
Այսօր դուք գտնվում եք դպրոցական աստիճանի վերջին շեմին: Հրաժեշտ եք տալիս դպրոցին, ձեր սիրելի ուսուցիչներին ու ընկերներին: Եվ այդ ամենի հետ ետևում են մնում մանկության ու պատանեկության հրաշք տարիները: Դուք մուտք եք գործել դպրոց, երբ բոլորովին մանուկ էիք: Միևնույն դասասենյակում, նույն նստարանին, կողք-կողքի հասակ եք առել, ուսանել ձեր ուոուցիչների մատուցած գիտելիքները, կրթվել ու դաստիարակվել, դարձել մեկ ընտանիք:
Առջևում նոր կյանքն է՝ ուսանողական նստարանը, աշխատանքային գործունեությունը կամ մեկ այլ ուղղություն: Դա ձեր ընտրությունն է: Իսկ ձեր ցանկությունների իրականացման ապահովումը երկրի ղեկավարության առաջնահերթ մտահոգություններից է, ինչին էլ միտված են նախագահ Սերժ Սարգսյանի և կառավարության գործունեության մոտեցումները:
Սիրելի շրջանավարտնե՛ր, շնորհավորում եմ ձեզ, ձեր ծնողներին և ուսուցիչներին: Թո՛ղ որ իրականանան ձեր բոլոր երազանքները: Բարի երթ, անսպառ ուժ, եռանդ և հաստատակամ ընթացք դեպի մեծ կյանք,,:
Շրջանավարտների համար օրը նշանավորվեց բազմաթիվ շնորհավորանքներով, հաճելի անակնկալներով, բարեմաղթանքներով: Հուզումնառատ եւ զգացմունքներով հարոստ ելույթներով հանդես եկան նաեւ իրենք՝ շրջանավարտները, ովքեր արտահայտեցին ուսումնառության տարիների իրենց տպավորությունները, մանկավարժների, դպրոցի հանդեպ ունեցած երախտագիտությունը, տվեցին ապագայում իրենց լավագույնս դրսեւորվելու հավաստիացումներ:
2013-2014 ուսումնական տարում, ընդհանուր առմամբ, մարզի 119 հանրակրթական դպրոցների միջնակարգն ավարտում է 1159, հիմնականը՝ 1481 աշակերտ: