Արագածոտնի մարզպետի աշխատակազմ

Արագածոտնի մարզպետ Սարգիս Սահակյանի մոտ տեղի ունեցավ խմելաջրի մատակարարման խնդիրներին եւ առաջիկա ծրագրերին նվիրված խորհրդակցություն, որին մասնացում էր ,,Հայջրմուղկոյուղի,, ՓԲԸ գլխավոր տնօրեն Պատրիկ Լորենը:
Պ. Լորենը ներկայացրեց ընկերության կողմից մարզում իրականացվող ծրագրերը, համաձայն որի, խմելաջրի համակարգերի վերանորոգման լայնածավալ աշխատանքներ են ընթանալու Աշտարակ քաղաքում եւ հարակից մի քանի գյուղերում: Արդյունքում՝ նախատեսվում է ջրամատակարարման էական բարելավում: Ինչ վերաբերում է դեկտեմբեր ամսին Աշտարակ քաղաքում գրանցված ջրամատակարարման խաթարումներին, ապա Պ. Լորենը դա բացատրեց եղանակային պայմաններով, քանզի աննախադեպ ցուրտը համատեղելի չէր տասնյակ տարիների վաղեմություն ունեցող մաշված ջրատար համակարգի հետ: Ըստ նրա, այդ եւ համանման խնդիրները կլուծվեն վերոհիշյալ ծրագրի իրականացման շնորհիվ:
Մարզպետ Սարգիս Սահակյանը գոհունակություն հայտնեց մարզկենտորնում եւ Աշտարակի տարածաշրջանում իրականացվելիք ներդրումների համար, եւ հարկ համարեց հիմնախնդիրները քննարկել ըստ տարածաշրջանների:
Աշտարակի քաղաքապետ Արմեն Անտոնյանը առանձնացրեց հետեւյալ հիմնախնդիրները: Մայր ջրագծերից դեպի բազմաբնակարան շենքերը տանող ջրատարերը չեն առանձնացված փականներով, ինչի պատճառով հնարավորություն չի լինում խափանումների դեպքում օպերատիվորեն կատարել վերականգնողական աշխատանքներ: Հաջորդ խնդիրները վերաբերում էին դեկտեմբեր ամսվա ընթացքում բազմաբնակարան շենքերում վթարված ջրատար խողովակների, ինչպես նաեւ քաղաքի մի քանի թաղամասերում կոյուղու համակարգերի վերանորոգմանը: Քաղաքապետին մտահոգում էր նաեւ օրվա կարգավորիչ ջրամբարների պահպանության խնդիրը:
Իրենց քաղաքներում առկա հիմնախնդիրները բարձրացրին նաեւ Թալինի քաղաքապետ Սարգիս Արամյանը եւ Ապարանի քաղաքապետ Գոռ Աբրահամյանը: Առաջինում, մասնավորապես, զգում են համակարգում կատարվող ներդրումների կարիք: Քաղաքում ջրի պակաս է զգացվում, ինչը առանձնակի սրվում է ամռան ամիսներին: Համակարգի մաշվածության խնդիր ունի նաեւ Ապարան քաղաքը, ինչի պատճառով ջրի կորուստը ավելի քան 50 %-ի է հասնում: Ինչպես Թալին քաղաքը, այնպես էլ Ապարանը ունի կոյուղու համակարգի վերանորոգման լուրջ խնդիր:
Խմելաջրի մատակարարման խնդիրների մասին խոսեցին նաեւ մարզի հեռավոր գյուղերի՝ Հակկոյի, Սորիկի եւ Գյալթոյի գյուղապետերը, որտեղ հատկապես ամռան ամիսներին ջրի լուրջ սակավություն է զգացվում: Հարցի լուծման համար նրանք կարեւորեցին խմելաջրի հավասարաչափ բաշխման, ինչպես նաեւ ցանցի վերանորոգման անհրաժեշտությկունը: Իսկ Արագածի տարածաշրջանի Բերքառատ, Գեղաձոր եւ հարակից համայնքների ջրամատակարարումն ապահովելու համար բարձրացվեց Գեղաձորի ջրամբարի նորոգման եւ արդյունավետ գործարկման խնդիրը:
Անդրադառնալով բարձրացված հարցերինին, Պատրիկ Լորենը կոնկրետ առաջարկներ արեց դրանցից յուրաքանչյուրի վերաբերյալ, նշելով, որ հնարավորությունների սահմանում ընկերությունը կփորձի դրանք ներառել առաջիկա ծրագրերում:
Սարգիս Սահակյանը կարեւորեց քննարկված բոլոր հարցերը, եւ դրանց հավելեց Եղնիկ համայնքի ջրամատակարարման խնդրի լուծումը, քանզի այդ հարցը գյուղում այսօր օրախնդիր է: Ամփոփելով խորհրդակցության աշխատանքը, մարզպետը Պատրիկ Լորենի հետ պայմանավորվեց նշված հարցերը լրացուցիչ ուսումնասիրել, դրանց լուծման համար համատեղ ծրագրեր եւ համապատասխան ժամանակացույց մշակել: