Նորություններ
Քննարկվեցին շախմատի զարգացմանը առնչվող հարցեր
03.10.2013
![](http://aragatsotn.mtad.am/files/n_pics/3950_s.jpg)
Արագածոտնի մարզպետ, շախմատի մարզային ֆեդերացիայի նախագահ Սարգիս Սահակյանի մոտ տեղի ունեցավ ֆեդերացիայի գործունեությանը եւ առաջիկա ծրագրերին վերաբերող քննարկում, որին ներկա էր Հայաստանի շախմատի ակադեմիայի հիմնադիր-նախագահ, միջազգային գրոսմայստեր Սմբատ Լպուտյանը:
Շախմատի ոլորտում կատարած աշխատանքների, իրականացրած ծրագրերի, խնդիրների ու առաջիկա անելիքների մասին խոսեց ֆեդերացիայի փոխնախագահ Աշոտ Թամազյանը: Նա ներկայացրեց, որ կազմակերպվել են տարաբնույթ մրցույթներ ու հավաքներ, որտեղ լավագույն արդյունք ունեցած շախմատիստները մասնակցել են հանրապետական նմանատիպ մրզույթներին: Հանրակրթական դպրոցներում հաջողությամբ են ընթանում շախմատի դասերը: Իբրեւ ձեռքբերում նշվեց այն փաստը, որ շախմատի ասպարեզում բավականին լուրջ հաջողությունների է հասել Աշտարակ քաղաքից Արսեն Դավթյանը: Մարզպետի հովանավորությամբ նա ներկայումս մեկնել է Մոնտե Նեգրոյի Բուդվա քաղաք՝ մասնակցելու Եվրոպայի պատանիների եւ աղջիկների առաջնությանը:
Անդրադառնալով քննարկված հարցերին, Սմբատ Լպուտյանը գնահատեց տեղերում կազմակերպվող շախմատային առաջնությունները, դրանց մեջ կարեւորելով հատկապես կարգային առաջնությունները: Նա առաջարկեց տարածաշրջաններում ստեղծել շախմատային օջախներ, որպեսզի այս մարզաձեւի զարգացումը մարզում ամբողջական եւ լիարժեք լինի:
Ֆեդերացիայի աշխատանքների վերաբերյալ քննարկումն ամփոփեց մարզպետ Սարգիս Սահակյանը: Նա պատրաստակամություն հայտնեց աջակցել ինչպես շախմատային օջախների ստեղծմանը, այնպես էլ այլ ծրագրերի իրականացմանը: