Արագածոտնի մարզպետի աշխատակազմ

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ծանոթացավ Արմավիրի եւ Արագածոտնի մարզերի մի շարք համայնքներում "Հայջրմուղկոյուղի" ՓԲ ընկերության կողմից իրականացվող ջրամատակարարման բարելավմանն ուղղված ծրագրերին:
Մարզպետ Սարգիս Սահակյանի ուղեկցությամբ Աշտարակ քաղաքում Ա. Գեւորգյանն այցելեց "Հայջրմուղկոյուղի" ՓԲ ընկերության օպերատիվ կենտրոն, ծանոթացավ ավտոմատացման եւ արդիականացման աշխատանքներին: Կենտրոնում տեղադրված ավտոմատ համակարգերի միջոցով հնարավոր է հետեւել ջրաբաշխման ողջ գործընթացին: Պատասխանատուները տեղեկացրեցին, որ արդիականացման աշխատանքները շարունակվելու են:
Փոխվարչապետը կարեւորեց նման համակարգերի ներդրումը ջրամատակարարման արդյունավետության բարձրացման տեսակետից, ինչը թույլ է տալիս վերահսկել ջրամբարներից վերցվող ու պոմպակայանների միջոցով մատակարարվող ջրաքանակը:
Փոխվարչապետին ներկայացվեց նաեւ Արագածոտնի եւ Արմավիրի մարզերի 14 գյուղական համայնքում ընթացիկ ամռանը մեկնարկած ջրամատակարարման ցանցի վերականգնման աշխատանքների ընթացքը: Ասիական զարգացման բանկի ֆինանսական աջակցությամբ իրականացվող ծրագրի շրջանակում ընդհանուր առմամբ նախատեսվում է 175 կմ ներքին ցանցի նորոգում, ավելի քան 5600 անհատական տների ջրաչափական հորերի կառուցում, օրվա կարգավորիչ ջրամբարների վերականգնում: Ծրագրի արժեքը 4,5 մլն դոլար է, աշխատանքները կավարտվեն հաջորդ տարի ամռանը:
Ա. Գեւորգյանը կարեւորեց ծրագրի նշանակությունը շահառու համայնքների համար` հույս հայտնելով, որ ծրագրի արդյունքում էապես կբարելավվի սպասարկման որակը, կավելացվի ջրամատակարարման ընդհանուր տեւողությունը:

Ըստ ՏԿՆ հասարակայնության հետ կապերի բաժնի