Պաշտոնական էլ. փոստ

(միայն www.e-citizen.am համակարգով ծանուցումների համար)

Տպել

Նորություններ

«Հայաստանը խաղաղության խաչմերուկում» ֆոլկլորային փառատոն՝ Արագածոտնում

12.09.2012

Ավելի քան մեկ տասնամյակ առաջ աշխարհի տարբեր երկրներում մեկնարկվել են «Ֆոլկլորը աշխարհի խաղաղության համար» խորագիրը կրող միջազգային փառատոններ, որոնց կարգախոսն է` ,,Աշխարհի մշակութային հարստությունը, դա ժողովուրդների բազմազանության երկխոսությունն է,,:
2011 թվականից սկսած՝ ,,Ավանդական Տոների Վերածնունդ,, հասարակական կազմակերպության նախաձեռնությամբ Հայաստանը եւս միացավ այս նախագծին: Իրականացվել են ավանդական ծեսերին, ավանդույթների, մշակույթի պահպանմանը միտված մի շարք նախագծեր, որոնց մասնակից են եղել ոչ միայն մայրաքաղաքի, այլեւ՝ մարզերի բնակիչները:
Դրանցից մեկը ,,Հայաստանը խաղաղության խաչմերուկում,, ֆոլկլորային փառատոնի կազմակերպումն է, որ մեկնարկել է սեպտեմբերի 8-ից 14-ը: Այն իր մեջ ներգրավում է ֆոլկլորային, երգչախմբային, պարային եւ թատերական համերգային ներկայացումներ, ինչպես նաև շրջիկ ցուցահանդեսներ եւ նպատակ ունի մշակույթի միջոցով նպաստել աշխարհի ժողովուրդների միջև երկխոսության ստեղծմանը:
,,Ավանդական Տոների Վերածնունդ,, կազմակերպության ղեկավար Հասմիկ Բաղրամյանի տեղեկացմամբ՝ փառատոնն իրենք ամբողջությամբ անցկացնելու են Արագածոտնի մարզի համայնքներում: Ծրագրում ընդգրկված են տեղի ազգային-ազգագրական համույթները եւ Իտալիայի ,,Չիոչիարիա,, մշակութային ասոցիացիայի, ,,Վալլե դի Կոմինո,, Ֆոլկլորային խումբը:
Սեպտեմբերի 11-ին կայացավ առաջին համերգային ծրագիրը: Այն անցկացվեց Կարբի գյուղում, որն, հիրավի, ամբողջությամբ վեր էր ածվել ֆոլկլորային արվեստի իրական բեմահարթակի:
Իտալիայից եւ մայրաքաղաքից ժամանած խմբերը հյուրընկալվեցին Վահան Թեքեյանի անվան դպրոցում, որի դահլիճում էլ կայացավ համերգը: Հայկական ժողովրդական, ազգագրական երգ ու պարով, փոքրիկ մանրապատումային երաժշտական կատարումներով հանդես եկավ ,,Տոնացույց,, համույթը: Իսկ ,,Վալլե դի Կոմինո,,Ֆոլկլորային խումբը ներկայացավ իտալական ազգային հնչեղ եւ գունեղ երգ ու պարով: Համերգի ընթացքում մեկտեղվեց երկու տարբեր ազգերի ֆոլկլորային երաժշտությունը՝ խորհրդանշելով հայ եւ իտալացի ժողովուրդների բարեկամությունը: Փառատոնի ավարտին հյուրերը մասնակիցը եղան հայկական ճոխ եւ ավանդույթներով լի հյուրասիրության:
Փառատոնն իր շարունակությունն ունեցավ սեպտեմբերի 12-ին՝ Ուջան գյուղում, որտեղ եւս օրը վերածվեց ազգային ավանդական երգ-երաժշտության իսկական տոնախմբության:
 

← Վերադառնալ ցուցակին

Բաժանորդագրում նորություններին

Տեխնիկական դիտողություններն կարող եք ուղարկել կայքի վեբ-մաստերի էլեկտրոնային փոստին: Կայքը պատրաստված է Helix ընկերության կողմից:
Վերջին թարմացումը՝ 2024-03-27 16:49:35