Նորություններ
Փոխվարչապետն աշխատանքային այցով Արագածոտնի մարզում էր
10.08.2012
ՀՀ փոխվարչապետ, տարածքային կառավարման նախարար Արմեն Գեւորգյանն այսօր այցելեց Արագածոտնի մարզ, որտեղ ծանոթացավ առաջնահերթ խնդիրների լուծման հրատապ ծրագրերով մարզի մի շարք կառույցների` հիմնականում դպրոցական շենքերի վերանորոգման ընթացքին:
Ծրագրերն ուղղված են մարզերում հրատապ խնդիրների լուծմանը`համայնքային նշանակության շինությունների հիմնանորոգմանը, ճանապարհների վերակառուցմանը, շենքերի տանիքների, օրվա կարգավորիչ ջրամբարների, պոմպակայանների, ոռոգման համակարգերի վերանորոգմանը:
Արագածոտնի մարզին առաջնահերթ խնդիրների լուծման երեք ծրագրերով հատկացվել է 2 մլրդ 1մլն 950 հազար դրամ, որով մարզի 114 համայնքներից շուրջ 87 տոկոսում իրականացվել եւ ընթացքի մեջ է 76 ծրագիր:
Փոխվարչապետն Արագածոտնի մարզպետ Ս. Սահակյանի ուղեկցությամբ այցելեց Գեղադիր եւ Վարդենուտ համայնքներ: Երկու համայնքում էլ հրատապ երկրորդ ծրագրով վերանորոգվում են համայնքների դպրոցները, այս նպատակով հատկացվել է համապատասխանաբար 90 մլն եւ 120 մլն դրամ:
Փոխվարչապետին զեկուցվեց, որ աշխատանքներն ավարտական փուլում են, եւ դպրոցները շահագործման կհանձնվեն օգոստոսի վերջին` հնարավորություն տալով նոր ուսումնական տարին սկսել վերանորոգված եւ լուսավոր դպրոցներում:
Համայնքների բնակիչները փոխվարչապետի հետ հանդիպման ժամանակ ներկայացրին համայնքային մի շարք խնդիրներ: Մասնավորապես`Գեղադիրում համայնքի բնակիչները Ա. Գեւորգյանի մոտ բարձրացրին խմելու ջրամատակարարման կարգավորման հարցը: Տեղեկացվեց, որ "Հայջրմուղկոյուղի" ՓԲ ընկերությունը օրվա կարգավորիչ ջրամբար է կառուցել տարածաշրջանի մի շարք համայնքների համար, վերանորոգել է ջրամատակարարման ներքին ցանցը,սակայն աշխատանքները մնացել են անավարտ, եւ համայնքների ջրամատակարարման խնդիրները դեռեւս չեն լուծվել: Պայմանավորվածություն ձեռք բերվեց, որ առաջիկայում ընկերության ղեկավարությունը կայցելի տարածաշրջան եւ մարզպետարանի ներկայացուցիչների մասնակցությամբ խորհրդակցություն կանցկացնի` բարձրացված հարցերը քննարկելու եւ լուծումներ տալու նպատակով:
Վարդենուտ համայնքի ղեկավարը ներկայացրեց առաջիկայում համայնքի գազիֆիկացման աշխատանքների հետ կապված խնդիրներ:Գյուղը գազիֆիկացվելու է Գյուղատնտեսության զարգացման միջազգային հիմնադրամի (IFAD) կողմից` համայնքի համաֆինանսավորմամբ: Աշխատանքների անխափան եւ արագ կազմակերպման նպատակով փոխվարչապետը համայնքի ղեկավարին առաջարկեց չուշացնել եւ ժամանակին վճարել համայնքի համար սահմանված համաֆինանսավորումը:
Ափնագյուղ համայնքում եւս Ա.Գեւորգյանը ծանոթացավ համայնքի դպրոցի վերանորոգման ընթացքին: Դպրոցի շենքի շինաշխատանքների համար գումար հատկացվել է հրատապ երրորդ ծրագրով `35մլն դրամ:Դպրոցում վերանորոգման աշխատանքները նոր են սկսվել եւ կավարտվեն հոկտեմբերի վերջին:
Փոխվարչապետը հորդորեց աշխատանքներն ավարտել հնարավորինս արագ եւ կազմակերպել այնպես, որպեսզի սեպտեմբերին չխանգարի ուսումնական գործընթացներին` միաժամանակ կարեւորելով որակյալ, անթերի աշխատանքների իրականացումը:
Ա.Գեւորգյանը նշեց, որ առաջնահերթ խնդիրներից է հանրակրթական հաստատությունների վերանորոգումը եւ մարզերում կրթության համար նպաստավոր պայմանների ստեղծումը`ընդգծելով,որ մարզերում եւս պետք է հնարավորություն ստեղծվի կրթություն ստանալ բարեկարգ, ժամանակակից պահանջներին համապատասխան դպրոցներում:
Արագածոտնում հրատապ երեք ծրագրերով կվերանորոգվի 20 դպրոց:
Փոխվարչապետն աշխատանքային այցի շրջանակում նաեւ եղավ Սասունիկ համայնքում,որտեղ հրատապ երկրորդ ծրագրով հատկացված 40 մլն դրամով ամբողջովին վերանորոգվել է մշակույթի տան կիսախարխուլ շենքը:
Ա. Գեւորգյանին զեկուցվեց, որ հրատապ ծրագրով նախատեսված աշխատանքներն իրականացվում են ըստ ժամանակացույցի եւ կավարտվեն սահմանված ժամկետում:
Այցի ընթացքում փոխվարչապետը տեղեկացվեց նաեւ Ապարան քաղաքով անցնող միջպետական նշանակության ճանապարհի 3 կմ հատվածի վերանորոգման աշխատանքների ընթացքի մասին, որոնք մեկնարկել են ս.թ. օգոստոսի սկզբին: