Արագածոտնի մարզպետի աշխատակազմ

Վերջին երկու օրում Արագածոտնի մարզի ողջ տարածքում չեն դադարում տեղումները՝ ձյան տեսքով, ինչի պառճառով ձնապատ են դարձել բոլոր՝ 4 տարածաշրջանների ճանապարհները: Այստեղ անընդմեջ մաքրման աշխատանքներ են իրականացնում ճանապարհաշինական ձեռնարկությունները:
Փետրվարի 1-ին, ժամը 17.00-ի դրությամբ Աշտարակի, Ապարանի, Թալինի եւ Արագածի տարածաշրջանների հանրապետական նշանակության բոլոր ճանապարհները բաց են: Երթեւեկելի են նաեւ Երեւան-Գյումրի-Վրաստանի սահման եւ Մարգարա-Վանաձոր միջպետական նշանակության ճանապարհների՝ Արագածոտնի հատվածները:
Առանձնակի դժվարություն կա Ալագյազ-Հոռոմ-Արթիկ հանրապետական նշանակության ճանապարհի Ալագյազ-Սանգյառ հատվածում, որտեղ, որքան էլ ճանապարհաշինարարները մաքրման աշխատանքներ են տանում, այդուհանդերձ, շարունակվող ձյունը եւ բուքը կրկին դժվարանցանելիություն են առաջացնում: Իսկ նույն ճանապարհի Սանգյառից մինչեւ մարզի ամենավերջին գյուղը՝ Նորաշենը տանող ճանապարհը բաց է:
Ձյունն ու բուքը խոչընդոտում են նաեւ բարձր լեռնային տարածքների՝ Արագածի եւ Ապարանի, այլ ճանապարհների մաքրման աշխատանքներին, որտեղ ձյան շերտը շուրջ 0,5 մետրի է հասնում: