Արագածոտնի մարզպետի աշխատակազմ

Ասմունքի մանկապատանեկան 4-րդ փառատոնի մարզային փուլը կայացավ նոյեմբերի 24-ին, Կարբիի Վահան Թեքեյանի անվան դպրոցում: Այս տարի փառատոնը նվիրված է արեւմտահայ բանաստեղծներ Պետրոս Դուրյանի 160, Վահան Թեքեյանի 133, Ռուբեն Սեւակի 126 եւ Միսաք Մեծարենցի 125 ամյակներին: Բանաստեղծություններն էլ ընտրված էին հենց նրանց ստեղծագործություններից:

Մրցույթը կայացավ երկու՝ 11-14 եւ 15-17 տարիքային խմբերում: Ընտրվել էր փառատոնի տարածքային փուլում լավագույնը ճանաչված 40 դպրոցական: Նրանք ներկայացնում էին Կարբիի, Ագարակի, Սասունիկի, Ոսկեվազի, Արագածավանի, Ապարանի թիվ 2 եւ ավագ, Թալինի թիվ 2, Աշտարակի թիվ 1,թիվ 2, թիվ 7, թիվ 5, Օշականի Մեսրոպ Մաշտոցի անվան, Կոշի, Ծաղկաշենի, Ոսկեհատի, Վարդենուտի եւ Նոր Եդեսիայի դպրոցները:

Մրցութային հանձնաժողովը բաղկացած էր 9 անդամից: Նրանց մեջ էին բանաստեղծ Ռազմիկ Դավոյանը, ԱԺ պատգամավոր Տաճատ Վարդապետյանը, ՀՀ ժողովրդական արտիստներ Ջուլիետա Բաբայանը եւ Բորիս Պեպանյանը եւ այլք: Ժյուրին նախագահում էր Մարիետա Մակարյանը:

Ամփոփելով մի քանի ժամ տեւած մրցույթի արդյունքները, հանձնաժողովը 11-14 տարիքային խմբում առաջին տեղը շնորհեց Սասունիկի դպրոցի աշակերտ Վահագն Մինասյանին, երկրորդը՝ Թալինի թիվ 2 դպրոցը ներկայացնող Մխիթար Գասպարյանին, երրորդը՝ Ապարանի ավագ դպրոցից Սաթենիկ Հովհաննիսյանին: 1-17 տարիքային խմբում 1-ին, 2-րդ, 3-րդ տեղերը համապատասխանաբար գրավեցին Լիլիթ Կարապետյանը (Կարբիի դպրոց), Ալլա Քոչարյանը (Աշտարակի ավագ դպրոց) եւ Մարիամ Դավթյանը (Ոսկեվազի դպրոց):

Չսահմանապակվելով մրցանակային տեղերով, հանձնաժողովն իր կողմից սահմանել էր լրացուցիչ մրցանակ, որին արժանացավ Սասունիկի դպրոցի 12 տարեկան աշակերտ Դանիել Սարգսյանը:

Մարզային փուլում մրցանակակիր դարձած բոլոր այս աշակերտները իրավունք ստացան մասնակցել փառատոնի հանրապետական փուլին: